✅ غياب المهارات التقنية
كاين نوعان هنا. النوع الأول فريق تقني ناقص خبرة مازال يكتب كود شكشوكة و بنية تحتية رقمية هشة. النوع الثاني فريق غير تقني يظن أنو يقدر يخلص مؤسسة خدمات رقمية تخدملو المنتج مرة و "تبيعلو الكود". ما علابالوش أنو بعد النسخة الأولى يلزم عوام و هو كل أسبوع تحديث جديد للمنتج حسب وش تعلم الأسبوع لي قبلو حتى يوصل لحاجة يحبوها الناس.
✅ الكسل
ما تتصورش الى أي مدى الكسل متفشي و شحال نادر تلقى بنادم صاحب هِمَّة. غالبا سبب الفشل ببساطة هو عدد ساعات العمل. نحكي عدد ساعات الdeep work ماشي تاع داير روحو يخدم. كاين لي بعد ما يحبس الوظيفة و يبدا مشروعو يرجع أكثر كسل من قبل لأنو غاب رب العمل لي كان يحاسبو.
✅ مازالك صغير
ما تقدرش تبدا ستارتاب طموحة مباشرة بعد التخرج. نقصو من مشاهدة الأفلام لي تحكي على الستارتابس. يليق عوام تبيع وقتك باش ترفد مهارات تقنية و تسويقية و مهارات تواصل و تطور الحدس تاع تحليل البيزنس و تخبي دراهم جانبا لي راح تمول بيهم مشروعك لأنو ماكانش لي راح يعطيك الدراهم. و زيد تروحلك الهشاشة النفسية و ترجع قادر على الصمود في وجه المخاطر و الضغوطات. كاين استثناءات نادرة تاع بنادم لي عندو نسبة ذكاء فوق المعدل و لي بالتوازي مع سنوات الجامعة كان يخدم و يرفد مهارات أضعاف وش يرفد في المقرر الجامعي.
✅ مشكل ما يوجعش
هادوك لي يخايرو فكرة فوق الشبعة لي ما هيش كامل أولوية في دزاير. اذا في جميع الحالات راح تتعب و تخاطر، أتعب و خاطر على فكرة لي تستاهل. حل مشكل يوجع بزاف و يوجع بزاف ناس. حل مشكل الناس مستعدين يخلصو و هم فرحانين باش يحلوه. كيما يقول الڨاوري :
"Painkillers are better than vitamins"
✅ المندبة كبيرة و الميت فار
لي تلقاهم كل أسبوع في الصف الأول في كل معرض و كل مؤتمر و كل فعالية و داير صور لينكدن يخطب أمام الملأ. في المقابل خلف الستار مخبي ارقام نمو تحَشَّم و منتج مهجور يصرخ بالرداءة من كل جانب. هادوك لي نساو أنو نجاحهم متعلق أولا و أخيرا بجودة المنتج و القيمة لي يخلقها و سهولة استخدامو و أنو قبل ما توصل لنقطة الProduct Market Fit عندك غير زوج خدمات في حياتك لي هوما تبني المنتج و تحكي مع المستخدمين باش تتعلم منهم، الباقي كامل راهو حس و تشتت و هدر للطاقة.
✅ ميت حي (زومبي)
ستارتاب زومبي هي لي تعيش حالة ركود أو نمو حلزوني و مولاها قاعد يخسر في صحتو و وقتو و يسنا في معجزة تصرا. يشوف نسبة بقاء (retention rate) تاع المستخدمين متدنية أو منعدمة و يتفرج دون تغيير المنتج. ما تحتاجش علم كبير باش تعرف أنو مستحيل تقدر تعمر كسكاس بالماء. المعيار الأول و الأخير باش تعرف اذا منتج لقى السوق تاعو هي "نسبة البقاء". استعملها كبوصلة.
✅ غياب الCommitment
هاذوك لي غير يجرب و الفيراج الأول يهز الدرابو علا هادي ديما نقول أخدم بيع وقتك عوام حتى توصل لوضعية مريحة باش تزدم زدمة باهية تاع "عقدنا العزم". الكوميتمنت مهم لأنو يلزم شحال من iteration قبل ما تكتشف الخلطة السحرية لي تخلي مشروعك الريادي يطير و اذا ماكانش كوميتمنت راح تحبس في الiteration الأولى.
باش مانكونش سلبي، نختم على رسالة ايجابية و نفكركم أنو الأخطاء هاذي و غيرها مرحلة لا بد منها في تاريخ ريادة الأعمال في دزاير ? مادامنا في بداية المسيرة. بعدها راح يطلع جيل ملقح (vacciné) و يفهم الجيل لي بعدو الفِخاخ لي كاين و كيفاه يتجنبها
.
Younes ChaouiYounes Chaoui • 1st• 1st Founder & CEO at Bricoram ????Founder & CEO at Bricoram ???? 12m • Edited •
نلتقي قريبا
